ԻՆՉՊԵՍ ԽԱՂԱԼ

Խաղը սկսում է այն մասնակիցը, որի անվան սկզբնատառն ամենամոտն է «Ա» տառին։ Խաղը շարունակվում է ժամացույցի սլաքի ուղղությամբ։

Ընդհանուր տրցակից վերցրեք մի խաղաքարտ և ընտրեք վրան նշված թեմաներից մեկը՝ ընթացիկ խաղափուլում օգտագործելու համար։ Թեմաներ կան, որոնք պահանջում են հստակ և ճշգրիտ պատասխաններ, կան նաև առավել ընդգրկուն թեմաներ, որոնց համար կարող եք տալ զուգորդական (ասոցիատիվ) պատասխաններ, օրինակ՝ «Հիվանդանոց» քարտը խաղարկելիս կարող եք հնչեցնել բժիշկ, բուժառու, կարմրուկ, ներարկիչ, մկան, լապարասկոպիա և շատ այլ բառեր, որոնք այս կամ այն կերպ առնչվում են այդ թեմային։

Եթե հանդիպի «Մասնակցի ընտրություն» խաղաքարտը, մասնակիցն իր ցանկությամբ կարող է բոլորովին նոր թեմա առաջարկել։

Ի դեպ՝ խաղաքարտի կապույտ երեսին նշված են ավելի հեշտ թեմաներ՝ նախատեսված փոքր տարիքի մասնակիցների համար, իսկ երկնագույն երեսին՝ բարդ թեմաներ՝ մեծահասակների կամ փորձառու մասնակիցների համար։

Խաղափուլի մեկնարկը

Հայտարարեք քարտի ընտրված թեման և սեղմեք անիվի կենտրոնում գտնվող ժամանակաչափի կոճակը։

Պատասխանի համար Դուք ունեք 10 վայրկյան։ Քանի որ անիվը չի ներկայացնում հայերենի բոլոր տառերը, պատասխանները պետք է սկսվեն անիվի վրա առկա տառերով։ Անիվի վրա սեղմեք Ձեր պատասխանի առաջին տառը, այնուհետև սեղմեք ժամանակաչափի կոճակը՝ ժամանակը վերականգնելու համար։

Հերթը փոխանցեք հաջորդ մասնակցին։ Տվյալ խաղափուլում արդեն սեղմված տառերն այլևս չեն կարող օգտագործվել, այնպես որ խաղի ընթացքը կբարդանա և լարումը կմեծանա, երբ տառերն աստիճանաբար սպառվեն։

Խաղից դուրս մնալը

Մասնակիցը դուրս է մնում տվյալ խաղափուլից, եթե՝

• չի հասցնում պատասխանել 10 վայրկյանում՝ մինչև ազդանշանը,
• տալիս է պատասխան, որը դուրս է թեմայից (որոշումն ընդունվում է մասնակիցների մեծամասնությամբ) կամ չի հասցնում այլ ընդունելի պատասխան գտնել 10 վայրկյանում,
• սեղմել է մի տառ, որով ընդունելի պատասխան չի կարող տալ։

Երբ որևէ մասնակից դուրս է մնում խաղից, հաջորդ մասնակիցը սեղմում է ժամանակաչափի կոճակը՝ շարունակելով խաղափուլը։ Խաղը շարունակվում է այնքան, մինչև մնում է մեկ մասնակից, որն էլ նվաճում է այդ խաղափուլի քարտը։

Հաջորդ խաղափուլի համար ընտրեք նոր քարտ և սեղմելով անիվի սև կոճակը՝ վերականգնեք տառերի ելման դրությունը։

Ավելացված ժամանակ

Եթե բոլոր տառերն օգտագործվել են, բայց խաղում դեռ մասնակիցներ կան, խաղը շարունակվում է հավելյալ խաղափուլով։ Տառերը բերեք ելման դրության և խաղը շարունակեք՝ նոր թեմայի համար տալով արդեն 2 պատասխան՝ միևնույն 10 վայրկյանի ընթացքում։

Հաղթում է խաղում մնացած վերջին մասնակիցը, որն էլ նվաճում է խաղարկված երկու քարտերը։ Եթե հավելյալ փուլը կարողանում է հաղթահարել մեկից ավելի մասնակից, խաղարկեք մեկ այլ թեմա՝ տալով արդեն երեք պատասխան, մինչև մնա մի մասնակից։

Հաղթանակ

Խաղը շարունակվում է այնքան, մինչև մասնակիցներից մեկը նվաճի երեք խաղաքարտ՝ դառնալով հաղթող։ Եթե ցանկանում եք ավելի երկար խաղալ, կարող եք պայմանավորվել և խաղարկել չորս, հինգ կամ ավելի քարտեր։

Նախապատրաստություն

1. Անիվը գլխիվայր շրջեք և ճշտորեն տեղադրեք մարտկոցները։ Այնուհետև անիվը միացրեք՝ անջատիչը բերելով «ON» դիրքի։
2. Անիվը ուղղեք, պահոցից հանեք խաղաքարտերը և դրեք սեղանին այնպես, որ հասանելի լինեն բոլոր մասնակիցներին։

Անհրաժեշտ ցուցում. Որպեսզի մարտկոցներն ավելի երկար ծառայեն, մի մոռացեք խաղն ավարտելիս անջատել անիվը՝ բերելով այն «OFF» դիրքի։